പൂളക്കുറ്റി: മേഖലയില്‍ ഉണ്ടായ ഉരുള്‍പൊട്ടലിന്റെ പശ്ചാത്തലത്തില്‍ ദുരിതാശ്വാസ ക്യാമ്പില്‍ കഴിയുന്നവര്‍ക്കായി കണിച്ചാര്‍ ഗ്രാമപഞ്ചായത്തിന്റെ നേതൃത്വത്തില്‍ കണ്ണൂര്‍ ബേബി മെമ്മോറിയല്‍ ഹോസ്പിറ്റലിന്റെ സഹകരണത്തോടെ മെഡിക്കല്‍ ക്യാമ്പ് സംഘടിപ്പിച്ചു. പൂളക്കുറ്റി ഹോമിയോ ഡിസ്‌പെന്‍സറിയില്‍ നടന്ന മെഡിക്കല്‍ ക്യാമ്പ് പഞ്ചായത്ത് പ്രസിഡണ്ട് ആന്റണി സെബാസ്റ്റ്യന്‍ ഉദ്ഘാടനം ചെയ്തു. വൈസ് പ്രസിഡണ്ട് ഷാന്റി തോമസ്, പഞ്ചായത്തംഗം ഷോജറ്റ് ചന്ദ്രന്‍ കുന്നേല്‍, വില്ലേജ് ഓഫീസര്‍ ബിജി ജോണ്‍ എന്നിവര്‍ സംബന്ധിച്ചു. ജനറല്‍ മെഡിസിന്‍, ഓര്‍ത്തോ, ശിശുരോഗം എന്നീ വിഭാഗങ്ങളിലാണ് പരിശോധന നടന്നത്. രോഗികള്‍ക്ക് സൗജന്യമായി മരുന്ന് വിതരണം ചെയ്തു.
