രണ്ട് വര്‍ഷത്തെ ഇടവേളക്ക് ശേഷം സംസ്ഥാനത്ത് ടൂറിസം മേഖലയില്‍ ഉണര്‍വ്. ക്രിസ്തുമസ് പുതുവത്സരനാളുകളില്‍ വിനോദ സഞ്ചാര കേന്ദ്രങ്ങളില്‍ ഇരട്ടിയിലധികം സഞ്ചാരികളെത്തിയെന്നാണ് കണക്ക്. ഇടുക്കിയില്‍ മാത്രം മൂന്ന് ലക്ഷത്തിലധികം സന്ദര്‍ശകരാണ് എത്തിയത്.
ഡിസംബര്‍ 20 മുതല്‍ ജനുവരി 1 വരെയുള്ള ദിവസങ്ങളിലാണ് സഞ്ചാരികളുടെ എണ്ണത്തില്‍ വര്‍ധനവുണ്ടായത്.രണ്ട് ലക്ഷത്തോളം പേരാണ് ഇടുക്കിയിലെ ഡി.റ്റി.പി.സി സെന്ററുകളിലെത്തിയത്.മുപ്പത്തി അയ്യായിരത്തോളം പേര്‍ ഇടുക്കി,ചെറുതോണി അണക്കെട്ടുകളില്‍ സന്ദര്‍ശനം നടത്തി.
മാട്ടുപ്പെട്ടി,രാമക്കല്‍മേട്,അരുവിക്കുഴി,ശ്രീനാരായണപുരം,വാഗമണ്‍,പാഞ്ചാലിമേട്,ഇടുക്കി ഹില്‍ വ്യൂ പാര്‍ക്ക്,മൂന്നാര്‍ ബൊട്ടാണിക്കല്‍ ഗാര്‍ഡന്‍ എന്നിവിടങ്ങളിലും സഞ്ചാരികളുടെ തിരക്കേറി. വനം വകുപ്പിന്റെയും ഹൈഡല്‍ ടൂറിസം കേന്ദ്രങ്ങളിലും സഞ്ചാരികളുടെ എണ്ണത്തില്‍ വര്‍ധനവുണ്ടായി.ജനുവരി പകുതി വരെ വിനോദ സഞ്ചാരികളുടെ തിരക്ക് തുടരുമെന്നാണ് അധികൃതരുടെ വിലയിരുത്തല്‍.
