പ്ലസ് വണ്‍ സീറ്റ് പ്രതിസന്ധിയില്‍ പ്രതികരണവുമായി മന്ത്രി വി ശിവന്‍കുട്ടി. മലപ്പുറത്ത് പ്ലസ് വണ്ണില്‍ കുറവുള്ളത് 2954 സീറ്റുകള്‍ മാത്രമെന്നാണ് മന്ത്രിയുടെ വിശദീകരണം. അണ്‍ എയ്ഡഡ് ഒഴികെ 11,083 സീറ്റുകള്‍ ജില്ലയില്‍ ഒഴിവുണ്ട്. ഇനി രണ്ട് അലോട്ട്‌മെന്റ് കൂടിയുണ്ടെന്നും മന്ത്രി പറഞ്ഞു. ഈ വിഷയത്തില്‍ രാഷ്ട്രീയ പ്രേരിതമായ സമരമാണ് നടക്കുന്നത്. ആദ്യ അലോട്ട്‌മെന്റ് കഴിയുമ്പോള്‍ തന്നെ സമരം തുടങ്ങി. കണക്ക് വച്ച് സമരക്കാരോട് സംസാരിക്കാന്‍ തയാറാണ്. സംഘര്‍ഷ സാഹചര്യത്തിലേക്ക് കാര്യങ്ങള്‍ കൊണ്ടുപോകരുതെന്നും വി ശിവന്‍കുട്ടി പറഞ്ഞു.
പ്ലസ് വണ്ണിലേക്ക് മൂന്ന് അലോട്ട്‌മെന്റുകളാണ് കഴിഞ്ഞത്. ജൂണ്‍ മാസം 24ന് ക്ലാസുകള്‍ ആരംഭിക്കും. രണ്ട് അലോട്ട്‌മെന്റുകള്‍ കൂടി ഇനി ഉണ്ടാകും. ജൂലൈ മാസം രണ്ടിന് ഇതിനായി അപേക്ഷ ക്ഷണിക്കും. ആകെ 4,21,661 പേര്‍ പ്ലസ് വണ്ണിലേക്ക് അപേക്ഷിച്ചു. 2,68,192 പേര്‍ക്ക് മെറിറ്റില്‍ അഡ്മിഷന്‍ ലഭിച്ചു. 18,850 കമ്മ്യൂണിറ്റി കോട്ട, 15474 മാനേജ്‌മെന്റ് ക്വാട്ട, 9049 അണ്‍ എയ്ഡഡ്, 4336 സ്‌പോര്‍ട്ട് ക്വാട്ട, 868 മോഡല്‍ പ്രസിഡന്‍ഷ്യല്‍ സ്‌കൂള്‍ എന്നിങ്ങനെയും അഡ്മിഷനായി. ആകെ 3,16,669 സീറ്റുകളില്‍ അഡ്മിഷന്‍ നല്‍കി കഴിഞ്ഞു.
77,997 പേര്‍ അലോട്ട്‌മെന്റ് നല്‍കിയിട്ടും അഡ്മിഷന്‍ എടുക്കാത്തവരാണ്. മലപ്പുറം ജില്ലയില്‍ ഇതുവരെ 49,906 സീറ്റുകളില്‍ പ്രവേശനം നല്‍കിയിട്ടുണ്ട്. അലോട്ട്‌മെന്റ് ലഭിച്ചിട്ടും അഡ്മിഷന്‍ നേടാത്തവരുടെ എണ്ണം 10,897 ആണ്. മെറിറ്റില്‍ ഇനി 5745 സീറ്റുകളുടെ ഒഴിവാണുള്ളത്. കമ്മ്യൂണിറ്റി കോട്ട 3759, മാനേജമെന്റ് ക്വാട്ട 50091, അണ്‍ എയ്ഡഡ് 10467 എന്നിങ്ങനെയും ഒഴിവുകളുണ്ട്.
മലപ്പുറത്ത് ആകെ 21,550 സീറ്റുകളുടെ ഒഴിവാണ് ഇനി ബാക്കിയുള്ളത്. അണ്‍ എയ്ഡഡ് ഒഴിവാക്കിയാല്‍ തന്നെ 11,083 സീറ്റുകള്‍ ഒഴിഞ്ഞ് കിടക്കുന്നുണ്ട്. മലപ്പുറത്ത് ഇനി പ്രവേശനം ലഭിക്കാനുള്ളത് 14037 പേര്‍ക്ക് മാത്രമാണ്. 2954 സീറ്റുകളുടെ കുറവ് മാത്രമാണ് ഉള്ളതെന്ന് മന്ത്രി പറഞ്ഞു. രണ്ട് അലോട്ട്‌മെന്റുകള്‍ കൂടി കഴിയുമ്പോള്‍ കുറച്ചു കുട്ടികള്‍ക്കു കൂടി അഡ്മിഷന്‍ ലഭിക്കും. വിഎച്ച്എസ്‌സി, അണ്‍ എയ്ഡഡ് പ്ലസ് ടു, മറ്റ് കോഴ്സുകള്‍ എന്നിവ തിരഞ്ഞെടുക്കാന്‍ താത്പര്യമുള്ളവര്‍ക്ക് അതിനും അവസരമുണ്ടെന്നും വി ശിവന്‍കുട്ടി പറഞ്ഞു.
