കീം പരീക്ഷാഫലം ഹൈക്കോടതി റദ്ദാക്കി. പരീക്ഷയുടെ പ്രോസ്പെക്ടസ് പുറത്തിറക്കിയശേഷം വെയിറ്റേജ് മാറ്റിയത് നിയമപരമല്ലെന്ന് ചൂണ്ടിക്കാട്ടിയാണ് നടപടി. ജസ്റ്റീസ് ഡി കെ സിങ്ങിന്റേതാണ് ഉത്തരവ്. എന്ജിനിയറിങ് പ്രവേശനത്തിനുള്ള പ്രവേശന പരീക്ഷയുടെ റാങ്ക് നിര്ണയ രീതി സി ബിഎസ്ഇ സിലബസ് വിദാര്ഥികളെ ദോഷകരമായി ബാധിക്കുന്നതായി ചൂണ്ടിക്കാട്ടുന്ന ഹര്ജിയിലാണ് വിധി വന്നിരിക്കുന്നത്. പ്രവേശന നടപടി തുടങ്ങാന് ഇരിക്കെയാണ് ഇത്തരത്തിലൊരു തിരിച്ചടി.
കേരള സിലബസിലെ പ്ലസ് ടു വിദ്യാര്ത്ഥികള്ക്ക് മാര്ക്ക് കുറയാത്ത രീതിയിലുള്ള ഫോര്മുലയാണ് ഇത്തവണ മുതല് നടപ്പാക്കി റാങ്ക് പ്രസിദ്ധീകരിച്ചത്. മാര്ക്ക് ഏകീകരണത്തില് വിദഗ്ധ സമിതി നല്കിയ ശുപാര്ശ മന്ത്രിസഭ അംഗീകരിച്ചതോടെയാണ് ഫലം പുറത്തുവന്നത്. ശുപാര്ശകളില് സര്ക്കാര് അന്തിമ തീരുമാനമെടുക്കാതിരുന്നതോടെ കീം ഫലം വൈകിയിരുന്നു. സംസ്ഥാന സിലബസില് പഠിച്ച വിദ്യാര്ഥികള്ക്ക് മാര്ക്ക് നഷ്ടപ്പെടാത്ത വിധം തമിഴ്നാട് മാതൃകയില് മാര്ക്ക് ഏകീകരണം നടപ്പാക്കാന് മന്ത്രിസഭായോഗം തീരുമാനിക്കുകയായിരുന്നു.
